ភ្នំពេញ៖ ឯកអគ្គរាជទូតថៃថ្មីប្រចាំកម្ពុជា លោក ឆឺតកៀត អាត់ថាកន (Cherdkiat Atthakor) បានជួបពិភាក្សាអំពីភាពជាដៃគូទ្វេភាគី នាថ្ងៃទី១៦ ខែកុម្ភៈ ឆ្នាំ២០២៣ ជាមួយរដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ លោក ប្រាក់ សុខុន។

ក្នុងជំនួបទ្វេភាគីនោះ ភាគីទាំងពីរបានពិភាក្សាគ្នាអំពីវិស័យមួយចំនួន ដូចជា ពាណិជ្ជកម្ម និងការវិនិយោគ ការងារ អប់រំ ការដោះមីន ហេដ្ឋារចនាសម្ព័ន្ធ និងការតភ្ជាប់ រួមទាំងច្រកព្រំដែនអន្តរជាតិផងដែរ។

ប្រទេសទាំងពីរបានបង្ហាញការពេញចិត្តយ៉ាងជ្រាលជ្រៅចំពោះទំនាក់ទំនងទ្វេភាគីដ៏រឹងមាំ។ ភាគីទាំងពីរនឹងបន្តពង្រីកកិច្ចទំនាក់ទំនង កិច្ចសហប្រតិបត្តិការលើគ្រប់វិស័យរវាងប្រទេសទាំងពីរជាបន្ថែមទៀត។

ជាមួយគ្នានេះភាគីទាំងពីរបានផ្តល់សារៈសំខាន់ចំពោះកិច្ចខិតខំប្រឹងប្រែងរួមគ្នា សំដៅសម្រេចឱ្យបាននូវគោលដៅពាណិជ្ជកម្មទ្វេភាគី ក្នុងទំហំទឹកប្រាក់ ១៥ ពាន់លានដុល្លារអាមេរិក នៅឆ្នាំ២០២៥។

ទន្ទឹមនេះ ប្រទេសទាំងពីរនឹងប្រតិបត្តិការបោសសម្អាតមីននៅតាមបណ្តោយព្រំដែន ដោយពុំចាំបាច់រង់ចាំការបញ្ចប់ការងារកំណត់ព្រំដែន នោះឡើយ ខណៈអាជ្ញាធរពាក់ព័ន្ធនៃប្រទេសទាំងពីរកំពុងរៀបចំឯកសារ ស្តីពី កម្មវិធីកិច្ចសហប្រតិបត្តិការអភិវឌ្ឍន៍សម្រាប់រយៈពេល ៣ឆ្នាំ បន្ទាប់ (២០២៣-២០២៥)។

រដ្ឋមន្ត្រីក្រសួងការបរទេសកម្ពុជា បានស្នើប្រទេសថៃបន្តផ្តល់ការយកចិត្តទុកដាក់ចំពោះពលករកម្ពុជា និងបន្តផ្ដល់អាហារូបករណ៍ ជូនដល់និស្សិតកម្ពុជា។

ឯកអគ្គរាជទូតថៃប្រចាំនៅកម្ពុជាបានជម្រាបជូនអំពីការត្រៀមរៀបចំដំណើរទស្សនកិច្ចផ្លូវការរបស់ឧបនាយករដ្ឋមន្ត្រី នៅប្រទេសថៃ ដែលគ្រោងនឹងធ្វើឡើងនៅចុងខែនេះផងដែរ៕

គូសបញ្ជាក់ថា បើយោងតាមរបាយការណ៍របស់ក្រសួងពាណិជ្ជកម្ម ទំហំពាណិជ្ជកម្មទ្វេភាគីរវាងកម្ពុជា និងថៃក្នុងឆ្នាំ២០២២ សម្រេចបានទំហំប្រមាណ៤,៦៦៤លានដុល្លារអាមេរិក កើនឡើង១៤.២៣ភាគរយ បើធៀបនឹងឆ្នាំ២០២១៕